迪甘斯潑冷水:基奧特唔一定有份踢世界盃

2022年09月24日 20:02
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
法國上仗歐國聯以2比0擊敗奧地利,擺脫榜尾位置,護級成功機會大增,該仗射入1球及1次助攻嘅基奧特表現備受好評,但領隊迪甘斯卻潑冷水,指呢位即將36歲嘅前鋒唔一定可以入選參加今屆世界盃嘅大軍名單。
迪甘斯話:「我為基奧特有出色表現,感到高興,佢喺球會度過艱難時期,每次踢國家隊都有精彩演出,但佢必須繼續保持水準先至得,我冇講過佢一定可以同球隊去卡塔爾踢世界盃,法國隊所有位置競爭都非常激烈,我需要時間考慮。」
事實上,基奧特上仗可以踢正選,好大程度上由於主力射手賓施馬受傷冇入選,一旦呢位皇馬前鋒歸隊,基奧特能否佔國家隊一席位仍屬疑問。
法國輿論普遍認為基奧特同基利安麥巴比非常合拍,因為兩人風格唔同,可以互補長短,反而賓施馬同麥巴比類型較似,位置有重疊之嫌。
同埋基奧特國際賽已累積入49球,只差2球,就可以追平亨利保持嘅法國隊最多入球紀錄,法國球迷都希望佢可以喺世界盃打破紀錄,至於迪甘斯會唔會聽取民意,大家拭目以待。