巴塞再中FIFA病毒　中堅為國捐軀

最強博彩盤路過關神器《串績王》：http://win.on.cc/football/　

西甲勁旅巴塞隆拿成為今次國際賽期「大苦主」，又有1位主力為國家隊比賽時受傷，中堅朗奴阿拿奧祖喺周六(24日)凌晨為烏拉圭踢熱身賽對伊朗，受傷退下火線，兩日之間已有4位巴塞球員「為國捐軀」，勢必嚴重影響教練沙維部署，令到原本今季回勇嘅巴塞隆拿再遭打擊。

今場比賽開波只係5分鐘，朗奴阿拿奧祖就拉傷肌肉，被換離場，屋漏偏逢連夜雨，烏拉圭最後以0比1不敵伊朗，效力波圖嘅前鋒達利美為伊朗攻入全場唯一入球。

最傷都係巴塞隆拿，因為前鋒迪比、中場法蘭基迪莊、後衞祖利斯古迪已經喺早1日歐國聯受傷，依家加埋朗奴阿拿奧祖，傷兵人數急增4人，據悉有份入選法國大軍名單嘅奧士文尼迪比尼亦感到不合適。

巴塞隆拿將於10月2日凌晨西甲作客馬略卡，跟住仲要踢歐聯作客國際米蘭，關鍵時候遇上傷兵潮，教練沙維肯定頭痛。