泰亞尼傷埋　阿仙奴國際賽傷兵「3連擊」

最強博彩盤路過關神器《串績王》：http://win.on.cc/football/　

開季表現大勇嘅阿仙奴，喺今個國際賽期受到連環打擊，加納中場湯馬士柏迪、日本守將富安健洋分別因傷宣布退隊，周日(25日)凌晨歐國聯B1組賽事，蘇格蘭主場2比1擊敗愛爾蘭，左閘基蘭泰亞尼又因撞傷頭部，踢唔夠半場就提早退下火線。

基蘭泰亞尼今場表現勇猛，多次硬碰頻頻「撞頭」，結果喺上半場尾段一次角球助攻第3次被撞到頭部後，軍醫決定佢唔適宜繼續比賽，提早離場。蘇格蘭今場先失1球下，下半場連入2球反敗為勝，依家以5戰得12分，2分力壓烏克蘭排榜首。

基蘭泰亞尼受傷對阿仙奴無疑係重大打擊，加納足總周六(24日)宣布湯馬士柏迪因膝頭有傷，已提前返倫敦治療，而日本足總亦證實富安健洋有傷在身，應球會要求而提前離隊。阿仙奴將會喺星期六(1日)英超大戰熱刺，傷兵問題勢必影響球隊備戰。