【有片】驚嚇勝利巡遊 球員險集體「斬頭」

2022年09月29日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
阿根廷球會貝格拉諾上星期提前鎖定乙組冠軍,下季得以升上阿甲逐鹿,球隊隨即舉行開蓬巴士勝利巡遊,畀球迷同球員盡情慶祝,勢估唔到勝利巡遊竟然係死亡陷阱!當時開篷巴士高速穿過一條僅僅夠高通過嘅天橋,巴士上層球員千鈞一髮下及時縮低,逃過集體「斬頭」命運,驚心片段亦喺網上瘋傳。
老牌球會貝格拉諾喺2019年降班乙組,佢哋周一(26日)作客3比2擊敗布朗競技後,即提前鎖定冠軍兼升班資格,球隊即刻安排勝利巡遊慶祝,總共15公里嘅路程都有大批球迷參與歡,幾乎所有球員都喺巴士上層狂歡兼向球迷致謝,有人坐欄杆邊、有人揮舞旗幟,場面非常熱鬧。
就喺大家熱烈慶祝期間,突然有多位球迷尖叫提醒球員小心,原來巴士即將穿過一條天橋,但天橋高度同巴士頂部只有幾吋距離,而且當時車速亦唔算慢,好在一班球員反應夠快,頂層所有人同一時間縮低,而且橋底設計亦係「漸進式」收窄,令球員有足夠時間避開,真係「險過剃頭」。
呢場驚嚇影片隨即被球迷瘋傳,大批粉絲留言批評負責制定巡遊路線嘅人「收買人命」:「諗呢條巡遊路線嘅人應該炒魷」、「X!個巴士司機應該被炒」、「好癲!冇人喺呢件事入面受傷真係非常幸運」。
當事人之一、阿乙神射手維基迪事後表示:「其實睇片係比我哋喺現場驚嚇,成件事有少少誇張咗,事前球會職員已提醒我哋過橋嗰陣要縮低頭,如果我哋覺得危險就唔會參加啦,一切都喺我哋控制之內。」