打完齋唔要C朗？家姐向葡迷開火

足球博彩神器，每日重心提供盡在《彩報》：http://win.on.cc/football/　

C朗拿度今季喺曼聯淪為後備，10場只入1球波嘅狀態令人擔心，隨住葡萄牙喺歐國聯出局，唔少球迷都將矛頭指向C朗，甚至要求唔好再畀C朗打正選。對於葡萄牙球迷「打完齋唔要C朗」嘅行為，C朗家姐Katia Aveiro就發文向球迷開火，直斥佢哋忘恩負義。

葡萄牙輸畀西班牙後，Katia Aveiro喺社交網發文炮轟葡萄牙球迷，而且言詞相當尖銳：「無論咩情況，C朗都有家人同愛佢嘅人喺身邊撐佢，不過依家嘅情況唔會令我驚訝，因為葡萄牙人就係鍾意喺自己食緊嘢隻碟吐口水......葡萄牙人就係病態、小器、愚蠢、忘恩負義，依家跪喺度嘅人係世界最佳球員C朗，但冇人會向佢伸出援手......」

C朗喺今個國際賽期，2場歐國聯踢足180分鐘都冇表現，當地媒體更提出「少啲C朗、多啲葡萄牙」嘅意見，希望國家隊可以減C朗出場時間，增加番團隊嘅合作，喺世界盃決賽周前先嚟「內鬥」，隨時會影響葡萄牙今屆決賽周嘅表現。