阿仙奴中場重傷開刀 緣盡世盃決賽周

20220930
東網電視
更多新聞短片
最強博彩盤路過關神器《串績王》:http://win.on.cc/football/ 
阿仙奴周六(1日)出戰「北倫敦打吡」前出現噩耗,英格蘭中場伊美路維因鼠蹊傷患嚴重,球會宣布已為佢做手術根治,最快都要12月先可以重投操練,意味佢肯定錯過11月開始嘅世界盃決賽周。不過「兵工廠」都有好消息,據報陣中4名傷兵已經康復,有望喺對熱刺一仗上陣。
22歲嘅伊美路維上年大爆發,仲入選埋英格蘭國家隊兼繼承阿仙奴件10號波衫,上季雖然受傷患困擾仍有10個英超入球,不過今季一直長居後備,據報佢係持續受到鼠蹊傷患影響,阿仙奴周四(29日)發出聲明,證實佢聽取專家意見進行手術徹底根治傷患,目標係12月復操,肯定錯過世界盃決賽周。
雖然伊美路維長抖,但阿仙奴周六主場對熱刺前都有好消息,喺國際賽期間受傷退隊嘅湯馬士柏迪、基蘭泰亞尼同富安健洋,以及較早前受傷嘅左閘辛真高,據報都已經克服傷患,可以喺呢場「北倫敦打吡」候命。