艾馬遜掟80萬鎊自我增值　博干地歡心

足球博彩神器，每日重心提供盡在《彩報》：http://win.on.cc/football/　

熱刺後防艾馬遜自上年加盟後，表現都係彈多過讚，不過呢位巴西球星就相當有心，竟然豪花80萬鎊自我增值，希望可以提升表現博取領隊干地歡心！艾馬遜「帶錢打工」嘅上進做法，絕對係所有老闆夢寐以求嘅好員工！

據英國《太陽報》報道，今季穩坐熱刺右翼衞正選嘅艾馬遜，原來私下用盡方法去改善演出，包括斥巨資購入「高壓氧治療艙 」幫助身體恢復、聘請神經科學家為自己減壓同心理輔導，甚至請埋球探去研究巴黎聖日耳門球星阿舒拉夫嘅踢法，製成報告畀佢參考，因為阿舒拉夫效力國際米蘭嗰陣，就係被干地打造成世界最佳右翼衞，艾馬遜希望從中偷師。

報道指艾馬遜以上種種自我增值措施，足足花咗佢80萬鎊，而呢位巴西球星喺熱刺嘅周薪只係得4萬鎊左右。艾馬遜如果真係可以提升水平，呢筆長遠投資將來都會有回報嘅。