曼聯打吡戰前先聲奪人 贏晒9月最佳將帥

2022年10月01日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
周日(2日)晚將上演英超「曼徹斯特打吡」曼城主場對曼聯,「紅魔鬼」曼聯先聲奪人,主帥坦哈格及前鋒拉舒福特分別當選英超9月最佳領隊及球員,坦哈格更成為繼2019年1月蘇斯克查之後,「後費Sir時代」第2位獲此殊榮嘅曼聯領隊,強勢挑戰昔日「上司」哥迪奧拿。
曼聯9月兩場英超贏晒,包括作客小勝李斯特城1比0,以及主場以3比1擊敗榜首阿仙奴,連同8月賽事在內,「紅魔鬼」已經取得英超4連勝,呢位荷蘭名帥攞獎絕對實至名歸隊。
值得一提,曼聯傳奇主帥費格遜退休後,球隊只有蘇斯克查同坦哈格可以當選英超月份最佳領隊,「紅魔鬼」今次請啱人。
坦哈格曾經有2年時間擔任拜仁二隊教練,期間經常同當時拜仁主帥哥迪奧拿見面同合作,坦哈格登陸英超第2個月就奪得月份最佳領隊,正好食住個勢,迎接「曼市打吡」挑戰曼城領隊哥迪奧拿。
至於拉舒福特9月兩場英超入2球及2次助攻,包括對阿仙奴一役梅開二度,但同時亦受傷一直缺陣,預料有望復出鬥曼城。
不過,拉舒福特今次當選有爭議,因為曼聯早前將隊內9月最佳球員獎頒畀基斯甸艾歷臣,證明佢表現更勝「福仔」,但拉舒福特卻獲得英超9月最佳球員獎,令人質疑賽會評選準則。