夏蘭特、科頓齊戴帽 曼城6:3降魔

20221002
東網電視
更多新聞短片
艾寧夏蘭特頭槌頂爆曼聯。(Getty Images)
周日(2日)晚英超上演曼市打吡,之前聯賽4連勝嘅曼聯,作客同市死敵曼城立即崩潰,半場已經落後4粒,「藍月亮」憑艾寧夏蘭特同菲爾科頓齊齊連中三元,夏蘭特更成為英超史上首位球員於連續3個主場上演帽子戲法嘅球員,最終以6:3大勝曼聯,勁到冇朋友。
曼聯賽前有主帥坦哈格及前鋒拉舒福特,獲選上月英超最佳領隊及球員,不過造訪有神鋒艾寧夏蘭特助陣嘅曼城難免受壓,一開波夏蘭特即施展頭槌被閂不遠,奇雲迪布尼補射畀迪基亞撲出,貝拿度施華再執雞又被擋。
但過到初一過唔到十五,8分鐘貝拿度施華左路橫傳,菲爾科頓妙射得手,極速打開紀錄。「藍月亮」得勢不饒人,34分鐘夏蘭特接應迪布尼頂入,3分鐘後又係佢哋合作,迪布尼於右路妙傳畀夏蘭特整多粒,完半場前夏蘭特助攻科頓近門射成4:0,半場已見唔少「紅魔」粉絲冇癮提早離場。
下半場曼聯略有起色,安東尼馬菲奧斯施冷箭彎入靚波,追成1:4。可惜佢哋都擋唔到夏蘭特,64分鐘佢接應沙治奧高美斯橫傳撞射破網,連續3仗主場聯賽連中三元,非常恐怖,72分鐘佢再靚交畀科頓完成帽子戲法。雖然曼聯靠後備上陣嘅安東尼馬迪爾梅開二度,但曼城最終仍然大炒6:3,實在超屈機。