希古恩近4場入5球　網民：返國家隊幫美斯啦

最強博彩盤路過關神器《串績王》：http://win.on.cc/football/　

前皇馬射手希古恩2年前加盟美職球隊國際邁亞密之後，一度表現低迷，逐漸被人遺忘，但佢近期突然翻生，呢位34歲老將近4場美職都有波入，合共轟入5球，狀態非常勇猛，難怪唔少網民建議阿根廷國家隊主帥史卡朗尼重召希古恩，幫手爭奪世界盃。

希古恩由7月開始，表現着晒火，近14場聯賽有12球進帳，特別係近3場都喺比賽末段射入致勝1球，包括上仗踢到86分鐘建功，協助國際邁亞密以1比0絕殺FC多倫多，令呢位曾經效力拿玻里、皇馬、車路士、AC米蘭、祖雲達斯嘅著名射手，再次引起球迷關注，呼籲佢重返阿根廷國家隊幫助美斯爭奪世界盃。

希古恩喺2014年世界盃決賽錯失單刀入波機會，成為阿根廷失冠罪人，受盡千夫所指，佢3年前已經宣布退出國家隊，甚至打算今季美職結束後掛靴，睇怕球迷嘅願望無法實現。