希古恩宣布掛靴　世界盃決賽單刀射斜抱憾終生

20221004
  • 東網電視
    更多新聞短片
    最強博彩盤路過關神器《串績王》：http://win.on.cc/football/　
    現時效力美職球隊國際邁亞密嘅阿根廷著名射手希古恩正式宣布，今季美職收咧之後，佢就會掛靴，結束17年職業球員生涯。
    呢位34歲前鋒曾經捧過西甲、意甲冠軍等多項錦標，但因為喺2014年世界盃決賽單刀射斜，成為阿根廷失冠罪人，抱憾終生。
    希古恩喺記者會上宣布退役決定時，神情哀傷，佢話係時候同職業足球講再見，畀自己好好同家人享受生活，並透露早於3、4個月前已經作出掛靴決定，同球會達成協，今季美職結束後離開。
    希古恩喺阿根廷勁旅河床出道，2007年加盟皇馬效力長達6年，捧過3次西甲冠軍，佢宣布掛靴後，皇馬都有向佢發出祝福及感謝以往為球隊作出嘅貢獻。
    此外，希古恩效力祖雲達斯期間亦贏過3次意甲冠軍，同埋分別協助拿玻里奪得意大利盃冠軍，以及幫車路士捧歐霸盃。
    希古恩2年前加盟國際邁亞密，曾經表現低迷，但今年7月開始，表現着晒火，近14場聯賽有12球進帳，甚至有球迷呼籲佢重返阿根廷國家隊。國際邁亞密今季仲有2場常規賽要踢，力爭季後賽資格。
    希古恩曾經為阿根廷入31球，但佢喺2014年世界盃決賽對德國，單刀射斜放生對手，結果阿根廷戰至加時失守輸0比1，同冠軍擦身而過，成為希古恩球員生涯最大污點。