費迪南激讚比寧咸　叫曼聯盡快出手

足球博彩神器，每日重心提供盡在《彩報》：http://win.on.cc/football/　

曼聯名宿里奧費迪南又畀意見，佢尋晚為多蒙特大炒西維爾做評述節目，大讚蜜蜂兵團中場祖迪比寧咸踢得好，話佢係同齡中最全面嘅中場，勁過謝拉特、林柏特、史高斯，叫曼聯快啲買。

多蒙特喺呢場歐聯分組賽作客大炒西維爾4比1，祖迪比寧咸交出1入球1助攻，表現出色，現場評述嘅里奧費迪南表示：「佢依家所做嘅嘢，佢嘅位置，喺呢個年齡我未見過，謝拉特、林柏特、史高斯......都做唔到，佢非常全面。」費迪南叫曼聯盡快行動。

曼聯同多蒙特有交易渠道，上季從多蒙特收購查頓辛祖，已成為球隊邊路主力，今季喺艾寧夏蘭特爭奪戰當中早早退出競爭，錯失咗該位挪威鋒霸，費迪南睇嚟好心急，唔想曼聯再錯過比寧咸。

早前多間英國傳媒報道，祖迪比寧咸將成為明年夏天轉會焦點之一，利物浦、車路士等隊都準備搶人，轉會費估計搶至近億鎊天價。