「新韋拉」1射1傳　阿仙奴派3蛋上榜首

足球博彩神器，每日重心提供盡在《彩報》：http://win.on.cc/football/　

今季表現神勇嘅阿仙奴，周五(7日)凌晨歐霸盃A組繼續奏凱，佢哋雖然派出大量副選球員，但主場仍輕鬆3比0大勝波杜基林特，當中葡萄牙新星法比奧韋拉1射1傳表現搶鏡。阿仙奴贏波後2戰全勝排小組榜首，出線形勢樂觀。

阿仙奴今場起用8個副選，仍然順利控制戰局，尼基迪亞23分鐘先開紀錄，4分鐘後洛賀丁接應法比奧韋拉傳中頂入，今場表現活躍嘅法比奧韋拉完場前6分鐘再有斬穫，佢接應加比爾捷西斯底線傳中抽入，協助阿仙奴大勝3比0。

22歲嘅法比奧韋拉今夏由波圖加盟，作為馬田奧迪加特後備嘅佢，喺有限機會下成功交出表現，今季只係3次正選就有2入波同1助攻。法國中場韋拉係阿仙奴傳奇，「兵工廠」球迷就將當年畀韋拉嘅打氣歌「翻生」，改為法比奧韋拉專屬打氣歌，閃電成為球迷寵兒。