10秒鐘食2黃牌　拉莫斯被逐累PSG失分

最強博彩盤路過關神器《串績王》：http://win.on.cc/football/　

「紅牌大王」沙治奧拉莫斯死性不改！周日(9日)凌晨法甲賽事，巴黎聖日耳門(PSG)作客被蘭斯悶和0比0，西班牙中堅沙治奧拉莫斯上半場尾段因為投訴球證，10秒內連食2張黃牌被逐，成為球隊失分罪人。

PSG今場有美斯受傷缺陣，尼馬亦先任後備，面對頑強嘅蘭斯創造機會唔多，踢到41分鐘嗰陣，馬高華拉堤回防攔截被判犯規，沙治奧拉莫斯即向球證投訴，用咗不當言語被罰黃牌，馬高華拉堤已經即刻將佢拉開，點知呢位火爆守將繼續出言不遜，逼到球證再向佢出示第2面黃牌，PSG打少個下最終只能對蘭斯悶和0比0。

今次係沙治奧拉莫斯職業生涯第29次食紅牌，當中21次喺聯賽被逐，繼續刷新歐洲5大聯賽被逐次數最多紀錄。PSG教練加迪亞賽後表示：「我唔知沙治奧拉莫斯係咪犯錯，我肯定佢唔係想侮辱球證，佢冇針對任何人，只係表達自己情緒，類似說話喺球場上面一個星期可以聽到幾百次。」