好波有好報　馬天尼利將獲肥約

最強博彩盤路過關神器《串績王》：http://win.on.cc/football/　

阿仙奴前鋒加比爾馬天尼利上仗射入1球及1次助攻，協助球隊以3比2擊敗利物浦，表現光芒四射，英國《每日郵報》指兵工廠準備同呢位21歲巴西國腳傾續約，將大幅加佢人工，由現時7萬鎊周薪加到20萬鎊。

加比爾馬天尼利將於2024年夏天約滿，會方有權優先同佢續約，但考慮到呢位新星表現愈來愈出色，為免被其他大球會挖角，所以兵工廠希望提早同馬天尼利續約，並有意開出20萬鎊周薪條件，令佢成為隊內最高人工球員之一。

阿仙奴現時只有2位球員周薪達20萬鎊，包括加比爾捷西斯、湯馬士柏迪，會方亦打算向另1位年輕主力布卡約沙卡開出20萬鎊周薪新約，所以阿仙奴開畀馬天尼利嘅新約，已經屬於球隊頂薪。

不過，據悉加比爾馬天尼利嘅代表對於續約條件仍然唔滿意，雙方仲未達成協議，兵工廠隨時需要加碼，先至留得住呢位天才射手。