巴塞又想炒教練　搵緊人頂替沙維

足球博彩神器，每日重心提供盡在《彩報》：http://win.on.cc/football/　

巴塞隆拿今季按照沙維意思組軍，想買邊個就邊個，點知錢就使咗，但就交唔到成績，歐聯瀕臨出局，國家打吡又輸畀皇馬，西班牙傳媒報道，巴塞又想炒教練，近日放風搵人頂替，至少有兩個人選。

巴塞近年頻頻換帥，華爾維迪教得好地地又唔鍾意，改搵史坦恩接手，但教咗半年又炒，喺荷蘭挖朗奴高文過檔，但一年多啲又炒，去年11月請來沙維，以為終於都安定落嚟，專心重建，但球隊稍遇挫折，會方又想換人。

報道指，巴塞正考察新帥人選，首選係46歲阿根廷教練馬些路加拿度，佢球員時代係阿根廷國腳，踢過巴黎聖日耳門，14年開始執教河床至今，佢同河床已屆約滿，巴塞準備搵佢頂替沙維。

另一人選大家都好熟悉，就係剛被車路士炒魷嘅杜曹，杜Sir有歐聯奪冠經驗，教車路士亦教得好，早前被炒變自由身，係巴塞下任主帥理想人選。