尼馬打甩「轉會欺詐案」　避過牢獄之災

最強博彩盤路過關神器《串績王》：http://win.on.cc/football/　

巴西球星尼馬2013年由山度士轉投巴塞隆拿過程中，被指同父母及前巴塞隆拿會長羅素爾隱瞞部份轉會費一案，終於有結果，西班牙檢察官決定撤銷對各人嘅控罪，尼馬避過2年牢獄之災。

今次案件由巴西公司DIS提出訴訟，該基金當年持有尼馬40%擁有權，指控巴塞及尼馬等有關方面隱瞞「枱底轉會費」，令基金獲得得轉會費大大減少，要求尼馬賠償1.5億歐元，一旦罪成，呢位30歲前鋒可能會被判入獄2年。

不過，經過審查之後，西班牙檢察官認為尼馬等人並冇犯罪，案件未達到刑事訴訟標準，所以撤銷對各人嘅控罪，認為DIS可以透過民事訴訟，追討有關轉會費損失。

雖然尼馬成功甩身，但又轉捲入另一個風波，佢喺近期巴西總統選舉，公開支持現任總統博爾索納羅，引起巴西足總不滿，擔心佢「選邊站」，可能會得罪另一政治陣營嘅巴西球迷，影響球隊爭奪今屆世界盃。