踢出身價波！卡斯米路當選曼聯10月最佳球員

最強博彩盤路過關神器《串績王》：http://win.on.cc/football/　

曼聯公布中場卡斯米路當選為球隊10月最佳球員，呢位30歲巴西國腳今夏以7,000萬歐元轉會費由皇馬加盟紅魔鬼，初時屈居後備，但之後愈戰愈勇，喺10月份有8次為曼聯正選上陣，其中2次當選為比賽最佳球員，踢出身價波。

卡斯米路成「魔」之後代表作，一定係上月英超作客車路士，踢到補時入波，協助球隊逼和1比1，所以有34%球迷投票支持卡斯米路做曼聯10月最佳球員，利辛度馬天尼斯以31%排第2位，拉舒福特有19%支持，排第3位。

值得一提，曼聯8月最佳球員係利辛度馬天尼斯，9月係基斯甸艾歷臣，10月係卡斯米路，換言之開季頭3個月嘅隊內最佳球員都係由今夏新加盟球員奪得，證明紅魔鬼增兵都算成功。