哥林威爾遜爆冷入英軍　兌現5年承諾

最強博彩盤路過關神器《串績王》：http://win.on.cc/football/　

英格蘭日前公布嘅世盃大軍名單，較為意外嘅名字係紐卡素前鋒哥林威爾遜，呢位30歲老將過去只曾為英格蘭踢過1場正選，對上一次上陣更係3年前，領隊修夫基表示揀佢全因為「狀態好」，而哥林威爾遜就成功兌現5年前對自己嘅承諾。

哥林威爾遜擊敗艾雲東尼、譚美阿巴謙入選，修夫基解釋：「哥林威爾遜狀態非常好，而且佢喺國家隊有多少少經驗，我哋對佢亦都較熟悉。」哥林威爾遜今季喺英超踢10場入6球，係紐卡素排聯賽第3嘅重要原因，佢兩名隊友尼克普比同捷比亞，同樣入選英格蘭大軍。

哥林威爾遜入選後表示：「2017年，我喺卡塔爾為膝部韌帶傷勢進行康復治療，當時我連英格蘭國家隊都未入過，離開卡塔爾前我同自己講，我會喺2022年返嚟踢世界盃。只要努力同決心，任何事情都有機會達成！」