英格蘭集結！球衣號碼預示曼聯3星擔正？

足球博彩神器，每日重心提供盡在《彩報》：http://win.on.cc/football/　

被視為今屆世盃熱門之一嘅英格蘭，周一(14日)正式集結準備出征卡塔爾，英格蘭足總亦公布各戰將球衣號碼，其中1至12號嘅主人同去年歐國盃拎亞軍完全相同，意味着3號嘅勞基梳爾、6號嘅哈利馬古尼同11號嘅拉舒福特，有望齊齊成為英格蘭主力。

英格蘭國腳周一集合後，齊齊出席一個贊助商活動，個個都笑得好開心咁攬頭攬頸，將之前喺英超嘅鬥爭暫時拋開，其中上輪聯賽受傷嘅李斯特城中場占士麥迪臣，亦有出席兼獲分發25號波衫，證明佢傷患無礙可以繼續卡塔爾之旅。

英格蘭足總公布嘅球衣號碼，1至12號都同歐國盃一樣，史達寧繼續着10號、哈利卡尼就着9號，正選位置受到質疑嘅哈利馬古尼亦Keep住件6號波衫，至呢1至12號球員絕大部份都係歐國盃期間主力，似乎會繼續獲領隊修夫基嘅信任。