威過總統老竇　添莫菲韋亞幫爸爸完成世盃夢

最強博彩盤路過關神器《串績王》：http://win.on.cc/football/　

美國出戰今屆世界盃嘅大軍名單擁有1位「總統之子」，就係添莫菲韋亞，呢位22歲前鋒嘅爸爸正係利比里亞總統韋亞。「老韋亞」球員時代曾獲得金球獎及世界足球先生，但從未踢過世界盃決賽周，「小韋亞」終於可以完成爸爸嘅夢想。

「老韋亞」係上世紀90年代嘅殿堂級射手，曾效力巴黎聖日耳門、AC米蘭、馬賽、車路士、曼城等豪門，1995年踏上事業顛峰，囊括金球獎及世界足球先生。不過呢位一代巨星國際賽生涯代表利比里亞國家隊，一直同世界盃無緣。

添莫菲韋亞喺美國出世，同爸爸一樣去法國搵食，屬於巴黎聖日耳門青訓產品，現時效力另一支法甲球隊里爾。不過「小韋亞」選擇代表美國，而非利比里亞，並於2018年5月為美國上陣對玻利維亞嘅熱身賽，射入1球，成為美國史上第4年輕入波球員，盡得爸爸射手觸覺遺傳。

由於美國無緣上屆世界盃，添莫菲韋亞等咗4年，終於有機會登上國際賽大舞台，隨時會成為耀眼超新星。