C朗自由身第1擊 率葡萄牙恰加納搶W

2022年11月24日 16:00
東網電視
更多新聞短片
世盃狂熱盡在《彩報》:https://win.on.cc/football/ 
葡萄牙「死亡H組」第一擊,今晚面對加納嘅挑戰。葡軍近4次世盃對非洲球隊3次半場領先,包括2014年曾以2比1擊敗今仗對手加納,佢哋往往把握到非洲球員入局慢嘅弱點,發動閃擊戰攻擊,加上C朗搞掂同曼聯嘅瓜葛,可以專心應戰,肯定更落力,今場仲有免費直播,一於玩個半場主勝,睇住波45分鐘就收錢。(ViuTV 99、Now 618及616周五凌晨12時直播)
新聞人物C朗日前已經講到明,自己嘅新聞唔會影響葡軍士氣同發揮。事實上,今屆世盃全球焦點都係佢同美斯兩人,前日美斯輸波,C朗難免更加肉緊,難怪香港球迷用「球玉」形容C朗,就係話佢每樣嘢都要做得多一啲,叻人一啲,所以喺球王個「王」字加多一點畀佢變成「玉」。
星光熠熠再非「一人球隊」
葡萄牙喺備戰最後一場熱身賽,刻意約戰非洲球隊尼日利亞,喺C朗因病缺席下仍然大炒對手4比0,今場有埋C朗復出,實力無疑更進一步。事實上,C朗對住非洲球隊特別有計,對上兩屆世盃分別鬥摩洛哥及加納均成功取得入球,葡萄牙喺世盃近4戰鬥非洲兵,亦有3次半場取得領先,格食格味道甚濃,加上現時球隊擁有多名世界級球員,如安達施華、貝拿度施華及祖奧簡斯路等,已非「一人球隊」。
加納雖有唔少外流球員,但甚少效力具爭標實力嘅球隊,前線仍要靠水晶宮嘅佐敦阿休及畢爾包嘅伊拿基威廉斯等,稍具實力嘅只係阿仙奴中場湯馬士柏迪,預料難抵葡軍強攻,半場主勝穩開。