粒粒皆星火力全開 尼馬率巴西食「塞」

2022年11月24日 18:00
東網電視
更多新聞短片
世盃狂熱盡在《彩報》:https://win.on.cc/football/ 
世盃G組重頭戲,巴西對塞爾維亞。兩隊於上屆世盃同組,巴西贏2比0,今屆再相逢,「森巴兵團」實力有增無減,攻擊點眾多,而且佢哋近7仗全勝,狀態對辦,絕非塞爾維亞能夠抵擋,再睇世盃近年成績,巴西近15仗世盃分組賽12勝3和,讓一球要上盤。(Now 618及616周五凌晨3時直播)
巴西每次點兵,都係歐洲5大聯賽精華大集合,第3次出戰世盃嘅王牌尼馬步入「3字頭」,就如陳年佳釀,表現愈見成熟,今季佢更加大熟大勇,喺巴黎聖日耳門嘅表現,甚至更勝另外兩位球王美斯及基利安麥巴比,巴西中前場由尼馬率領一班進攻天才出擊,當然甚具瞄頭。
塞軍欠缺對強隊經驗
事實上,尼馬嘅鋒線拍檔,包括加比爾捷西斯、拉芬夏比洛尼、雲尼斯奧斯祖利亞等等,均在所屬聯賽各領風騷,加上中鋒李察利臣隨時候命,仲有「扭波王」安東尼馬菲奧斯吸引眼球,新舊球員在世盃外合作無間,進攻相當立體,以呢隊巴西嘅實力,小組首名出線應無問題,世盃第一擊可望旗開得勝。
塞爾維亞表面上於世盃外力壓葡萄牙首名出線,但其實存在一定運氣成分,睇埋佢哋今年喺歐國聯參加B級聯賽,話就話獲得4勝1和佳績,但對手實力只屬二線,根本不能作準。
始終塞爾維亞近年甚少與頂級勁旅碰頭,陣中主力阿歷山大米祖域(富咸)、米連高域沙域(拉素)喺所屬聯賽皆並非爭標分子,整體實力同巴西有一定距離,今仗難免處於被動,輸波不足為奇。巴西上盤讓一球,可以話坐走望贏。