威爾斯有奇招　出動「英倫伊巴」轟炸伊朗

世盃狂熱盡在《彩報》：https://win.on.cc/football/　

威爾斯上仗世界盃逼和美國1比1，加里夫巴利射入12碼做功臣，但其實仲係一位無名英雄，就係後備上陣嘅前鋒基化摩亞。

呢位身高1米96嘅「威爾斯伊巴謙莫域」制空力高，擅長衝散對手防線，預料領隊羅拔比治將於第2場分組賽派出基化摩亞「轟炸」伊朗。

威爾斯上仗上半場表現欠佳導致落後，換邊後主帥羅拔比治立即用基化摩亞入替丹尼爾占士，效果立竿見影，佢憑住強大衝擊力，對美國防線構成重大威脅，賽後當選最佳球員嘅加里夫巴利都話基化摩亞先至係真正MVP。

現年30歲嘅基化摩亞近期狀態大勇，過去3場英超為般尼茅夫攻入3球，代表作一定係對熱刺，個人梅開二度，加上上仗世界盃後備上陣亦作出重要貢獻，相信下仗鬥伊朗，可以出任正選，特別係伊朗防線制空力弱，上仗被英格蘭炸散，基化摩亞到時應該有大把發揮空間。