「英美大戰」變成多蒙特金童對決

2022年11月24日 20:32
東網電視
更多新聞短片
(Getty Images)
世盃狂熱盡在《彩報》:https://win.on.cc/football/ 
世界盃B組「英美大戰」亦係2位效力多蒙特嘅金童對決,英格蘭19歲中場祖迪比寜咸上仗為球隊打開紀錄,表現搶鏡。至於美國20歲新星基奧雲尼雷拿被譽為「北美馬納當拿」,2位新世代球星亦敵亦友,今仗交鋒肯定好睇過戲。
祖迪比寜咸成為近期最炙手可熱新星,今季為多蒙特上陣22場入9球,被認為係英格蘭史上罕見嘅全能中場,獲得皇馬、利物浦、曼城等大球會垂青,估計身價高達1.3億鎊。
至於能夠擔任翼鋒及進攻中場嘅基奧雲尼雷拿出身於多蒙特青年軍,2年前已經冒起,佢係名將之後,爸爸係曾經效力利華古遜、格拉斯哥流浪、新特蘭、曼城等歐洲球會嘅雷拿,「小雷拿」亦喺英格蘭出世,但佢選擇代表美國。
基奧雲尼雷拿個人技術出眾,其中今年3月世界盃外圍賽對墨西哥,佢個人突破扭過對方6位球員,被指似足1986年世界盃阿根廷球王馬納當拿以一人之力摧毀英格蘭。英軍今次遇上呢位「北美馬納當拿」,真係要打醒十二分精神。
另外,美國有多位球員效力英超球會,包括車路士翼鋒基斯甸普列錫、阿仙奴門將馬特端納、列斯聯後衞泰拿阿當斯等,兩隊交鋒可以話英超舊生聚會。