李察利臣驚天金球 巴西贏波再現R9威力

2022年11月25日 07:16
東網電視
更多新聞短片
陳瀅Kylie C陪你喺《彩報》玩轉世盃:https://win.on.cc/football/ 
5屆冠軍巴西周五(25日)凌晨亮相,喺G組首仗2比0擊敗塞爾維亞。「森巴兵團」今場贏得唔輕鬆,王牌尼馬全場受到對手粗野「招呼」,最後階段更被踢傷喊住離場,好在巴西箭頭李察利臣擔起大旗,個人包辦2個入球,第2球更加係超精彩嘅凌空車身入波,難怪被視為朗拿度之後巴西最強「R9」。
擁有夢幻攻擊線嘅巴西,上半場受制於塞爾維亞嚴密防守,製造埋門機會唔多,換邊後巴西加快進攻速度,60分鐘阿歷士辛度30碼放冷箭中柱,2分鐘後雲尼斯奧斯射門被撲出,李察利臣門前「執雞」射入。73分鐘李察利臣再演身手,禁區內接應傳中將個波「的」高,再施展凌空車身將個波大力轟入,之後巴西有尼馬被踢傷足踝退下火線,但仍然保住2比0勝局。
延伸閱讀:【尼馬被狂踢9腳 足踝腫起喊住離場】
2002年世盃巴西喺傳奇「R9」朗拿度帶領下捧盃,之後巴西都冇一位可靠箭頭出現,李察利臣今屆着起9號,個人首次世盃演出即入2球,亦係佢近7次代表巴西入嘅第9球,無負「新R9」之名。現年25歲嘅李察利臣賽後表示:「我嘅兒時夢想成真,4個星期前受傷係我人生最低點,唔知自己趕唔趕得切踢世盃,今場證明我嘅付出係值得。」
對於轟入超精彩嘅「世界波」,李察利臣就話:「我之前喺意大利集訓嗰陣,喺訓練入面已經有類似入球,我踢英超已經習慣面對對手縮後死守,所以我知道如果有機會射門再一定要嘗試。」效力熱刺嘅李察利臣今季喺英超未入過波,但返到巴西就判若兩人。