尼馬被狂踢9腳　足踝腫起喊住離場

世盃狂熱盡在《彩報》：https://win.on.cc/football/　

巴西喺世盃旗開得勝，但王牌球星尼馬就斯人獨憔悴，佢今場成為塞爾維亞緊盯目標，全場受到9次侵犯，結果喺79分鐘被逼下火線，尼馬右腳足踝被影到腫到變豬蹄，呢位前鋒坐喺後備席上不禁痛哭，似乎傷勢唔輕。

鍾意賣弄腳法嘅尼馬，上屆世盃已經係對手重點招呼目標，4年前對瑞士一役被踢10次，係自1998年後世盃單場被侵犯之數最多紀錄，今仗尼馬幾乎再次超越自己，塞爾維亞全場有12次犯規，其中9次就係喺尼馬身上，其中一次被對手扯到件波衫都幾乎甩埋出嚟，相當誇張。

尼馬上半場被侵犯5次、下半場被侵犯4次，踢到尾段終於頂唔住，離場除鞋後見到右腳足踝明顯腫起，佢返到後備席後更用波衫遮瞼痛哭，完場後佢亦由軍醫扶住，一拐一拐咁走返更衣室。巴西下輪對瑞士，尼馬上唔上到陣成為疑問。