球員托弗乘勢求連勝 英格蘭主W趁熱食

2022年11月25日 18:03
東網電視
更多新聞短片
世盃狂熱盡在《彩報》:https://win.on.cc/football/
今晚世盃B組次輪賽事,首仗盡顯霸氣嘅英格蘭食住個勢強戰美國。「三獅兵團」球員狀態及士氣高昂,近年喺國際大賽表現亦穩定,經過舊年歐國盃決賽洗禮,今屆志切更上層樓,面對以新人掛帥嘅美國有明顯優勢,熱捧主勝。(Now 618及616周六凌晨3時直播)
英格蘭喺世盃前6場不勝,點知分組賽首仗即以6比2大炒伊朗一掃頹風。今屆世盃喺歐洲主流聯賽中途開打,一眾球星得以迅速入局,布卡約沙卡、史達寧、基亞利殊同拉舒福特上仗已經順利開齋,隊長哈利卡尼亦交出兩次助攻,顯示佢哋進攻板斧極多,唔再集中喺卡尼一人身上。
英格蘭上場早早領先,尾段已經畀主力休息,球員養精蓄銳,而且一眾後備兵上陣亦交足貨,顯示雄厚嘅後備力量。翻查數據,英格蘭近5次同美國交鋒,「三獅兵團」錄得4勝1和嘅壓倒性優勢,3分可謂志在必得。
美國活力有餘輸經驗
美國上輪被威爾斯逼和1比1,其實佢哋表現唔曳,不過陣中多位主力都非常年輕,添莫菲韋亞、達斯及尤路斯穆沙等主力都是「00後」,活力有餘但經驗明顯不足,面對見慣風浪嘅英格蘭,美國相信難以招架,主勝熱得有理。