世盃首紅!威爾斯門將被逐 伊朗險勝

2022年11月25日 20:04
東網電視
更多新聞短片
威爾斯門將軒尼斯「天殘腳」踢跌泰尼米。(Getty Images)
陳瀅Kylie C陪你喺《彩報》玩轉世盃:https://win.on.cc/football/ 
周五(25日)晚世界盃B組第2輪,終於出現今屆賽事第一張紅牌,威爾斯門將軒尼斯衝出禁區,用「天殘腳」踢跌半單刀嘅伊朗前鋒泰尼米,被球證出示紅牌趕出場。亞洲勁旅伊朗把握機會,補時連入2球,以2比0擊敗威爾斯。
伊朗首仗以2比6慘敗於英格蘭腳下之後,知恥近乎勇,今仗一開波就搶攻,有「伊朗美斯」之稱嘅阿斯蒙起腳,但欠力度,被門將軒尼斯接實。
至於首仗打和美國1比1嘅威爾斯亦有基化摩亞近門起腳,但角度太正,被伊朗門將侯斯恩尼擋出。
踢到15分鐘,伊朗中場哥利沙迪曾經射門入網,但球證睇完VAR後,判越位入波無效。其後伊朗利用罰球組織攻勢,可惜阿斯蒙頭槌攻門斜出,呢位27歲前鋒臨完上半場仲有1次近門失機,中場路洛拉希遠射,亦無功而還。
延伸閱讀:【反政府球員國內被捕 伊朗賽前突齊唱國歌】
換邊之後,伊朗加強攻力,阿斯蒙單刀長驅直進起腳,但中柱彈出,隊友哥利沙迪攞到波之後,遠射再中另一條門柱,呢支西亞球隊認真黑仔。
之後伊朗攻勢一浪接一浪,中場艾沙杜拿希起腳,被威爾斯門將軒尼斯撲到貼柱出界,威爾斯有後衞賓戴維斯勁射高出。
83分鐘,威爾斯門將軒尼斯衝出禁區,使出「天殘腳」粗野踢跌半單刀嘅伊朗前鋒泰尼米。球證睇完VAR之後,出示紅牌將軒尼斯趕出場,令佢成為今屆首位被逐嘅球員。
伊朗踢多1人之下,補時由捷舒米遠射入波打開紀錄,其後列沙伊安再建一功,驚險贏2比0。