麥巴比效率驚人！追平比利神紀錄

陳瀅Kylie C陪你喺《彩報》玩轉世盃：https://win.on.cc/football/　

法國喺周日(27日)凌晨世界盃D組，以2比1擊敗丹麥，基利安麥巴比包辦2個入球，呢位前鋒以23歲零234日成為世界盃史上第2位累積入到7球嘅「U24」球員，同巴西球王比利睇齊，換言之只要「麥總」今屆再入1球，就可以超越比利，相信機會非常大。

基利安麥巴比上屆世界盃入4球，協助法國奪得冠軍，佢今屆表現更出色，連續2場入波，合共有3球進帳，除咗追平比利保持嘅世界盃24歲以下球員入波紀錄之外，亦以31球追平法國球王施丹嘅國家隊入波數字，並列法國隊歷史射手榜第7位，但「麥總」只係踢咗61場，效率非常高。

再對比其他球星，基利安麥巴比入球率更加驚人，佢第2度出戰世界盃已累積入7球，兩大球王美斯、C朗同樣踢第5屆，先至入到8球，以「麥總」嘅年齡同效率，將來應該有望打破世界盃歷史射手王高路斯入16球嘅紀錄。