菁英盃 90+2入波!香港U23終於開齋

2022年11月30日 21:56
東網電視
更多新聞短片
客串前鋒的黎皚韜(左),嘗試與卡爾特納爭頂頭槌。(李浚湣攝)
「菁英盃」周三(30日)於旺角大球場上演B組獨腳戲,由香港U23面對晉峰。晉峰上半場有葉卓文慘食詐胡,補時階段香港U23靠後備入替的鄧筵霑入球,成功以1比0擊敗晉峰,兼取得今季首勝。
香港U23今場強陣出擊,張俊軒夥拍黃浩然扼守中路,黎培基、林樂賢坐鎮中場,黎皚韜客串中鋒,與袁世傑負責攻堅。晉峰陣容稍為不整,楊憲樂擔任中堅,卡爾特納、邵昀俊及班哲文負責在中場掃蕩,前鋒周睿弘今季首次擔正,而王牌費利浦薩先列後備。
晉峰甫開賽即反客為主,9分鐘周睿弘橫傳,林樂勤禁區頂射門,被門將顏翱天接實。26分鐘黃政德右路傳中,播磨浩謙頭槌頂斜。8分鐘後晉峰差點先開記錄,葉卓文接應罰球頭槌頂入,但旁證卻指越位在先,慘食詐胡。
易邊後晉峰換入費利浦薩、伍家揚加強攻力,53分鐘鄭璟昊後上助攻,壓入禁區後起腳,顏翱天擋出不遠,費利浦薩近門射高。香港U23後衞嚴啟倬,之後因膊頭甩骹退下火線,但比賽尾段球隊未有放棄,先有梁煒烽差點在門前剷入,可惜被鄭璟昊及時護空門,補時階段鄧筵霑禁區內勁射破網,最終香港U23以1比0險勝晉峰,取得今季首勝。
賽後晉峰總教練何信賢,承認今場球隊表現不及對手:「優勝劣敗,我哋太多失誤,具威脅埋門機會少,呢場波係表現好差,輸波賽果係合理。」何信賢直言欣賞對手香港U23球員的決心,認為己隊在這方面需要有改善。
香港U23主教練司徒文俊接掌帥印後,首次帶領球隊取勝,賽後他表示對戰果感開心:「由季初到依家,一路以來都相信緊我哋有一日會贏波,等咗好耐,依家終於等到。」司徒文俊承認首勝比預期來得較遲,但希望球隊必須要保持信心:「佢哋係有潛質,上到嚟喺職業層面,要越級挑戰好多比佢哋實力強嘅強隊、經驗畀佢哋好嘅球員,但佢哋要相信自己有能力,即使對住更強對手,都可以做到嘢。」