安歷基世盃後或離隊　西足總難抗英超搶人

陳瀅Kylie C陪你喺《彩報》玩轉世盃：https://win.on.cc/football/　

西班牙喺今屆世界盃表現出色，但主帥安歷基仍然好大機會喺賽事結束後離隊，西班牙足總主席魯拜利斯承認，面對英超等豪門球會搶人，實在冇把握留住呢位52歲名帥，至於最終會唔會換帥，預料明年1月會有答案。

一直有傳車路士等大球會有意邀請安歷基執教，魯拜利斯接受西班牙傳媒體訪問時話，以足總嘅財力根本唔夠大球會爭：「大球會可以出1,000萬或者2,000萬歐元年薪聘請領隊，足總冇可能咁做，安歷基亦明白，其實佢之前已經拒絕過大球會開出嘅高薪合約，當世界盃結束後，我哋會坐低再傾，相信明年1月會有結果。」

除咗英超球會之外，2支西甲勁旅巴塞隆拿、馬體會亦可能明夏換帥，其中巴塞管理層不滿教練沙維帶隊連續2屆歐聯分組賽出局，因而有意邀請安歷基回巢。

至於馬體會今季成績大倒退，早已盛傳教練施蒙尼帥位不穩，會方視安歷基為接任人選之一。