烏拉圭贏波出局　蘇亞雷斯哭成淚人或掛靴

世盃狂熱盡在《彩報》：https://win.on.cc/football/　

烏拉圭喺世界盃H組最後一輪分組賽，以2比0擊敗加納，雖然同贏葡萄牙嘅南韓同得4分，但因為得球唔及對方，即使贏波都逃唔過出局厄運，賽後35歲前鋒蘇亞雷斯哭成淚人，今場可能成為佢職業生涯告別戰。

烏拉圭上半場憑迪阿拉斯卡達梅開二度，領先加納2球，下半場繼續狂攻對手，但未能再取得入球，最終僅以2比0勝出。

烏拉圭、南韓同分，得失差都係0，但烏拉圭踢3場分組賽總入球只有2球。相反南韓以2比1反勝賽前提早出線16強嘅葡萄牙之後，3場分組賽合共攻入4球，比烏拉圭多出2個入球，得以小組次名晉身16強。

今場落力演出嘅蘇亞雷斯有1次助攻，但踢到下半場66分鐘退下火線，佢賽後得悉球隊因為得球唔及南韓而出局，被影到傷心落淚，蘇亞雷斯今屆賽事未有入波，最終失望而回，盛傳佢踢完世界盃後就會退役。