波蘭後衞搶到美斯波衫 今場吼實麥總?

20221203
東網電視
更多新聞短片
馬迪卡斯。(Getty Images)
世盃狂熱盡在《彩報》:https://win.on.cc/football/ 
波蘭上場雖然0比2輸畀阿根廷,但最終雙雙出線,阿士東維拉後衞馬迪卡殊更加「中大獎」,就係畀佢成功攞到美斯波衫,事後佢喺社交媒體炫耀,16強對法國,佢會唔會集郵攞埋「麥總」嗰件?
波蘭對阿根廷賽後,由於兩隊都晉級,可謂皆大歡喜,不過每場得到美斯波衫嘅球員只得1個,呢場波嘅幸運兒就係馬迪卡殊,主要原因係卡殊嘅維拉隊友達米安馬天尼斯,就係阿根廷正選門將。
卡殊表示:「當日賽後達米安馬天尼斯同我講,話有份禮物送畀我,叫我跟住佢去更衣室通道,然後佢就帶咗件美斯波衫出嚟,送咗畀我。」
「呢件係最好嘅禮物,能夠見到真實嘅美斯,中場休息時美斯喺我身邊走過,我望到實,佢係美斯啊。」卡殊事後歡天喜地喺社交媒體發圖,配上GOAT(史上最佳縮寫)。
波蘭16強惡鬥法國,美斯巴黎聖日耳門隊友基利安麥巴比件波衫,卡殊有冇機會搶到?