巴西官宣　耶穌仔迪尼斯打柴

陳瀅Kylie C陪你喺《彩報》玩轉世盃：https://win.on.cc/football/　

巴西於世盃分組賽最後一仗0比1不敵喀麥隆，雖然唔影響首名出線資格，但就再添兩名傷兵，巴西官方周六(3日)晚公布，加比爾捷西斯同阿歷士迪尼斯嚴重受傷，無法繼續餘下賽事，將安排離隊大隊治理。

巴西確定出線權後大幅輪換，讓一班副選落場表演機會，但面對爭出線嘅喀麥隆，球員都無法避免受傷，阿歷士迪尼斯於下半場54分鐘受傷離場，10分鐘後輪到「耶穌仔」加比爾捷西斯退下火線，據稱兩人膝部傷勢嚴重。

巴西官方證實，核磁共振檢查顯示，兩人無法繼續餘下賽事，工作人員正聯絡兩人所屬球會阿仙奴及西維爾，以確定留在多哈或返回球會治療。加比爾捷西斯估計要抖3周，踢唔到世盃之餘，英超阿仙奴嘅賽事都受影響。

按照規定，巴西已不能再作補選，餘下24名球員完成餘下賽事，由於領隊迪迪共徵召9名前鋒，「耶穌仔」離隊影響不大，但左閘人選唔多，阿歷士迪尼斯受傷對巴西左路防線影響頗大。