英塞球迷冇品 球場嚴查禁帶雷射筆入場

2022年12月03日 23:06
東網電視
更多新聞短片
世盃狂熱盡在《彩報》:https://win.on.cc/football/
世盃16強「英塞戰」開打在即,由於兩軍球迷嗰底花晒,為愛隊贏波乜都夠膽死,據報呢場嘅保安團隊會嚴陣以待,禁止粉絲將雷射筆帶入球場,影響比賽。
點解保安咁緊張,因為雙方球迷都有前科。今年3月世盃外非洲區第3圈,塞內加爾對埃及兩回合打和1比1,需要互射12碼分勝負,喺極刑大戰時塞軍球迷用雷射筆干擾埃及球員,搞到埃軍頭兩輪都射失,包括被射到滿身綠點嘅王牌穆罕默德沙拿,最終塞內加爾互射12碼贏3比1,驚險取得世盃入場券,事後塞軍亦被罰款。
英格蘭球迷都唔嘢小,喺上年歐國盃4強對住丹麥,激戰至加時博到12碼,當隊長哈利卡尼操刀嗰陣,攝錄機影到「三獅兵團」粉絲用雷射筆,將激光射向丹麥門將卡斯柏舒米高雙眼,企圖影響佢視線,卡尼亦一射破網領軍殺入決賽,呢班粉絲認真冇品,難怪今仗保安團隊要嚴查兩軍球迷喇。