兩曼聯棄將入波 「方丈」率荷蘭入8強

20221204
東網電視
更多新聞短片
迪比。(Getty Images)
世盃狂熱盡在《彩報》:https://win.on.cc/football/ 
世盃16強展開,荷蘭火併美國,「橙軍」荷蘭憑迪比及戴利白蘭特上半場奠勝,以3比1獲勝率先殺入8強。巧合嘅係,迪比同戴利白蘭特都係曼聯棄將,領隊尹戈爾更係著名嘅曼聯棄帥,外號「方丈」,今仗齊在卡塔爾揚威。
荷蘭大軍賽前一度傳出受流感侵襲,多人受感染,幸好正選陣容未受太大影響,迪比、加普、卡拉臣、法蘭基迪莊均在陣;美國方面擺出進取嘅433,基斯甸普列錫率領添莫菲韋亞及捷西斯費拉拿3箭頭出擊。
開賽僅2分鐘美國有入波機會,基斯甸普列錫突破越位單刀埋門,荷蘭門將路比治及時出迎擋出,荷蘭逃過一劫,並於10分鐘憑快速反擊開紀錄,杜費斯右路地波傳中,迪比勁射破網,荷蘭領先1比0。
荷蘭「戰術大師」尹戈爾今仗採用穩守突擊策略,任由美國控球進攻,憑鐵桶防守頂住攻勢,以突擊一招致命,整個上半場荷蘭控球只有36%,完半場補時再有機會,右路一次界外球戰術,杜費斯地波傳中,戴住心臟起搏器上陣嘅戴利白蘭特射成2比0完半場。
下半場形勢不變,荷蘭繼續穩守突擊,並換入貝雲積、古普美拿斯等,美國方面則換入基奧雲尼雷拿及夏治胡禮力求翻身,74分鐘,夏治胡禮單刀扭過埋門將射空門,但角度太窄被回防後衞救出。
2分鐘後,夏治胡禮另一次埋門,接應基斯甸普列錫傳中球門前撞入,為美國追成1比2,不過荷蘭立即回敬一球,戴利白蘭特助攻杜費斯「窩利」破網,荷蘭81分鐘贏到3比1,美國反擊之火亦被撲滅,杜費斯今場交出1入球2助攻,表現出色,最終荷蘭贏3比1,殺入8強。