【有片】烏拉圭中堅打FIFA官員　面臨停賽15場

去片睇荷西基文尼斯打人

https://bit.ly/3H8c4eI　

烏拉圭最後一輪世界盃分組賽贏加納，但仍然出局，賽後一班球員嬲爆，除咗前鋒卡雲尼離場時打爛VAR設備儀器之外，中堅荷西基文尼斯仲離譜，批肘打國際足協(FIFA)官員後腦，過程被攝影機影晒，證據確鑿，呢位效力馬體會嘅27歲後衞，面臨停賽15場處罰。

當時球證施伯特吹完場，以卡雲尼為首嘅烏拉圭球員由於不滿全場多個爭議性判決，上前同施伯特理論，甚至唔畀佢走，需要由FIFA工作人員協助離場。

呢個時候荷西基文尼斯衝前繼續追鬧球證，唔知有心定無意，批肘打中1位賽事監督後腦，荷西基文尼斯仲對住鏡頭爆粗鬧球證。

片段喺網上瘋傳，引起國際足協關注，預料將會展開調查，一旦罪成，荷西基文尼斯可能會被罰停賽15場。

今次事件被指同2014年世界盃蘇亞雷斯咬意大利中堅基亞連尼一樣嚴重，結果「哨牙蘇」被罰全球停賽3個月，荷西基文尼斯隨時步呢位國家隊隊友後塵。

陳瀅Kylie C陪你喺《彩報》玩轉世盃：https://win.on.cc/football/