「耶穌仔」抖3個月　阿仙奴要求巴西放人

世盃狂熱盡在《彩報》：https://win.on.cc/football/　

巴西前鋒加比爾捷西斯喺最後1輪世界盃分組賽對喀麥隆，整傷膝部，今屆無法再上陣，巴西傳媒指呢位25歲射手需要做手術治療傷勢，起碼抖3個月，所屬球會阿仙奴要求巴西隊盡快畀「耶穌仔」返倫敦養傷。

據悉阿仙奴總監伊度正在同巴西隊相關人士交涉，希望對方將加比爾捷西斯送番倫敦接受治療，以免令傷勢惡化。巴西主帥迪迪對於是否放人，並冇意見，問題係加比爾捷西斯希望留隊，為隊友打氣，甚至乎如果巴西捧盃，佢可以現場享受奪冠喜悅，所以唔想走人，兵工廠方面急都冇用。

加比爾捷西斯今夏由曼城轉投阿仙奴後，表現出色，今季英超上陣14場入5球及5次助攻，成為球隊排榜首嘅功臣，如果佢真係缺陣3個月，勢必影響阿仙奴爭標大計。