曼聯赴西班牙集訓 查頓辛祖又冇份去

20221206
東網電視
更多新聞短片
(曼聯Twitter圖片/Getty Images)
曼聯趁英超空檔期赴西班牙集訓,約戰當地球隊友賽保持狀態,陣中一班冇份踢世界盃嘅球星都有隨隊出征,不過就唔見查頓辛祖嘅身影。呢位仍受傷患困擾嘅曼聯翼鋒,繼早前無緣入選英格蘭世盃大軍之後,今次連友賽都冇份去,仲被發現留喺英格蘭自主操練。
「紅魔」今次出征西班牙,將會與卡迪斯及貝迪斯兩支西甲球隊「拍跳」,準備英超重開。除了一班陣中小將之外,迪基亞、域陀連迪路夫及雲迪碧克等唔洗踢世界盃嘅球員,都已經隨球隊到達當地,不過查頓辛祖就冇份隨隊。據報係坦哈格出到聲,要求呢位前多蒙特球星留喺英格蘭獨自訓練,仲話咁樣做,係希望佢可以專心練波,重拾狀態。
現年22歲嘅查頓辛祖,2021年加盟「紅魔」被寄予厚望,今季開咧8場比賽一度攻入3球,可惜其後表現無以為繼,連世界盃大軍都冇佢份。唔知經過休賽期特訓之後,查頓辛祖可唔可以踢返起呢?