隔世代球王公投　麥巴比完勝美斯

陳瀅Kylie C陪你喺《彩報》玩轉世盃：https://win.on.cc/football/　

兩支傳統勁旅阿根廷、法國一齊打入世界盃8強，雙方射手美斯、基利安麥巴比頻頻入波，演出非常搶鏡。西班牙傳媒喺社交網舉行投票，想知球迷眼中，邊位表現更佳，結果麥巴比以超過6成選票完勝美斯。

3.3萬人投票之中，有61.8%人認為麥巴比今屆表現好過美斯，僅38.2%人撐美斯。將於12月20日踏入24歲嘅基利安麥巴比今屆世界盃已有5球進帳，高居射手榜第1位，至於美斯入咗3球，睇單入球數字，已經有明顯分野。

同埋麥巴比場上充滿活力，奔跑速度非常高，上仗對波蘭，曾經做出時速35.3公里衝刺，拍得住牙買人百米飛人保特。反觀35歲美斯年紀已大，冇咗以往個人盤扭突破表演，「欣賞指數」的確唔及麥巴比。

另外，麥巴比踢第2屆世界盃已累積入9球，追平踢第5屆嘅美斯入波數字，現役球員之中，僅比德國中場湯馬士梅拿少1球，由於德國已經出局，麥巴比好大機會超越梅拿。呢場隔世代球王之爭，麥巴比勝出好合理。