阿根廷軍情外洩　史卡朗尼迫記者供「內鬼」

陳瀅Kylie C陪你喺《彩報》玩轉世盃：https://win.on.cc/football/　

阿根廷喺世盃8強大戰荷蘭前，上演一幕「捉鬼」鬧劇，中場主將迪保羅日前喺一課閉門練習入面受傷，但相關消息竟然外洩。賽前記者會有記者問到迪保羅傷勢，阿根廷領隊史卡朗尼即時扯火，公開要求記者供出洩密「內鬼」嘅身份。

阿根廷周六(10日)凌晨對荷蘭，今屆4場賽事踢足360分鐘嘅迪保羅，據報喺周三(7日)一課閉門練習出現肌肉傷患，8強大戰上陣成疑。DirecTV嘅記者喺賽前記招問到迪保羅傷患，史卡朗尼就扯火：「點解你會問呢個問題？我哋係閉門操練！」

記者回答因為迪保羅未能完成操練，史卡朗尼即刻大迫供：「如果你講出爆料人嘅身份，我就同你講迪保羅嘅情況。」記者拒絕要求後，史卡朗尼不滿表示：「我唔知消息點樣外洩，我哋係閉門操練，洩密嘅人唔知係幫阿根廷定係荷蘭。我哋要改善阿根廷嘅大環境，呢個問題仍然需要學習。」