摩洛哥神龍獲拜仁垂青　頂替紐亞

世盃狂熱盡在《彩報》：https://win.on.cc/football/　

德國隊及拜仁慕尼黑門將紐亞度假期間滑雪斷腳，提早收咧，拜仁急住搵龍門，世盃賽場就有個現成喺度，佢就係摩洛哥神龍耶辛尼保奴，據報道呢位門將演出深得拜仁高層簡尼讚賞，打算簽佢擔任拜仁正選門將。

31歲嘅耶辛尼保奴係摩洛哥殺入世盃4強嘅大功臣，包括16強互射12碼淘汰西班牙，8強對葡萄牙作出3次關鍵撲救，證明佢頂得住壓力，可以喺歐洲豪門立足，拜仁本身已擁有摩洛哥國腳後衞馬沙拉奧，簡尼認為耶辛尼保奴能當重任，係下半季德甲同歐聯嘅門將最佳人選。

《每日郵報》報道，除咗拜仁，英超阿士東維拉同狼隊都想簽佢協助護級，但兩支英超隊嘅吸引力遠遠不及拜仁，報道指，耶辛尼保奴與西維爾合約至2025年，不過佢身價唔高，德國《轉會市場》顯示其身價為1500萬歐元，而兩年前佢由基羅納轉投西維爾，當時轉會費僅400萬歐元，以拜仁財力，收購呢位神龍相當簡單。