阿根廷第27人！阿古路加入訓練教射波

世盃狂熱盡在《彩報》：https://win.on.cc/football/　

阿根廷今屆世盃排除萬難殺入決賽，唔單止全隊26個球員上下一心，傳奇前鋒阿古路自8強開始亦現身打氣，決賽前更破天荒落埋球場練波，雖然呢位超級射手掛靴啱啱1年，但射術完全冇生疏，而且仲同新星祖利安艾華利斯等密密斟，似要傳授佢嘅入球秘技，難怪阿根廷傳媒都稱阿Kun係阿根廷「第27人」。

依家只係34歲嘅阿古路，上年12月15日宣布因心臟問題提早掛靴，估唔到1年後佢仍然喺阿根廷國家隊中，只不過角色改變。阿根廷決賽前舉行15分鐘招待傳媒嘅公開操練，阿古路突然着起訓練波衫出現，先同祖利安艾華利斯、柏利迪斯、迪保羅等坐場邊，之後更落場練埋一份，而且射波腳腳七注，展示佢為阿根廷入過41球嘅威力。

作為美斯昔日國家隊「室友」，阿古路係阿根廷最大支持者，8強對荷蘭後見到佢同荷蘭球員激烈爭執，4強賽後又親自向美斯頒發最佳球員獎座，決賽前更加親自落場做埋教官，如果阿根廷最後捧盃，阿古路都會被視為重要成員。