有救星！車路士斟掂「新杜奧巴」

最強博彩盤路過關神器《串績王》：http://win.on.cc/football/　

車路士季初換帥，請來樸達執教，但成績仍然冇改善，近5場英超不勝，會方急不及待準備下月冬季轉會市場重開後，增兵提升實力。英國各大傳媒指車仔已經同挪超球會莫迪達成協議，以1,050萬鎊收購莫迪射手大衞科芬拿救亡。

由於車路士年輕射手布查早前踢熱身賽受重傷，需要長抖，得番奧巴美揚1位正前鋒可用，所以會方迅速出手斟掂大衞科芬拿。

呢位20歲新星身高1米81，剛過去挪威球季為莫迪各項賽事上陣39場入22球，成為球隊奪得挪超冠軍嘅功臣，吸引車路士主帥樸達注意，提出將佢收購旗下。

莫迪已經同意將大衞科芬拿出售畀車仔，只要佢通過體測及達成個人待遇協議，就可以完成交易。值得一提，大衞科芬拿同車仔傳奇射手杜奧巴都係科特迪瓦人，球迷都好期待佢成為「新魔獸」，協助車路士重返顛峰。

另外，車路士嘅法國後衞韋斯利科芬拿，都有科特迪瓦血統，屆時兩位「科芬拿」並肩作戰一攻一守，真係考起講波佬。