年尾總結　麥總重上身價榜第1位

世盃狂熱盡在《彩報》：https://win.on.cc/football/　

基利安麥巴比雖然世盃衞冕失敗，但佢喺決賽連中三元，以8球奪得世盃神射手，已經盡顯身價，《transfermarkt》年尾公布嘅最高身價11人，麥總重新超越宿敵艾寧夏蘭特，以1.8億歐元重登世界最高身價球員寶座。

麥總喺世盃前以1.6億歐元跌落第2，夏蘭特以1.7億登頂，呢個最高身價11人於卡塔爾世盃後更新，世盃後麥總憑出色表現，以1.8億歐元再度爬頭，夏蘭特因為冇分踢世盃只能保持第2，不過兩大射手遠遠拋離其餘球星幾條街，相信未來許多年都係佢兩個鬥。

身價由1.2億至1億歐元共有5人，暫時以雲尼斯奧斯祖利亞身價稍高，有1.2億歐元，不過只係祖迪比寧咸仲未發力，相信到明年1月或明夏轉會窗期間，身價榜又要更新；至於新上榜球員係左閘「面具俠」加華度爾，世盃後身價暴升至7500萬歐元，仲貴過荷蘭新星馬菲斯迪歷特。

雖然今屆世盃打起幾位鋼門，但最值錢門將始終係比利時嘅泰拔高圖爾斯，身價6000萬歐元。