【官宣】C朗加盟艾納斯 16億年薪破世界紀錄
20221231
東網電視
更多新聞短片
最強博彩盤路過關神器《串績王》：http://win.on.cc/football/
葡萄牙球王C朗轉戰亞洲，正式加盟沙特阿拉伯球隊艾納斯，雙方簽約2年，據悉呢位37歲前鋒獲得1.73億鎊(約16億港元)年薪，比巴黎聖日耳門前鋒基利安麥巴比多近一倍，成為史上最高人工運動員，身為「刷數據之王」嘅C朗又再創下一項世界紀錄。
C朗接受英國名嘴皮爾斯摩根專訪時數臭曼聯，導致同紅魔鬼關係破裂，雙方喺11月世界盃舉行之前解約，佢恢復自由身後，雖然曾經同皇馬等其他歐洲勁旅扯上關係，但都只聞樓梯響，最終接受艾納斯邀請，加盟呢支中東富豪球隊。
據悉C朗同艾納斯簽下嘅合約分成兩部分，首2年以球員身份為球隊比賽，年薪為1.73億鎊，其中部分為商業收入，另外會擔任大使，協助沙特阿拉伯、埃及同希臘聯合申辦2030年世界盃決賽周等工作，所以C朗今次合約可能長達7年，總值12億鎊(約113億港元)，實在非常誇張。
C朗加盟艾納斯之後，將會着招牌7號球衣，佢話對於未來充滿期待：「我非常激動可以去一個唔同國家體驗新聯賽，艾納斯嘅發展藍圖好有吸引力，十分高興可以同隊友們一齊努力，幫助球隊獲得更大成功。」
艾納斯亦發表聲明，話創造咗歷史，今次簽入C朗唔只可以為球會帶來成功，更加可以振興整個聯賽、國家，提升沙特阿拉伯新世代青年嘅視野。C朗已經完成第一部分體測，將於未來幾日內進行餘下部分體測，亞洲足協亦發文，歡迎C朗登陸亞洲。
世界最高薪5大運動員(年薪)
1.C朗(足球) 1.73億鎊
2.基利安麥巴比(足球) 9,000萬鎊
3.米高遜(高爾夫球) 8,400萬鎊
4.伊華尼斯(拳擊) 7,000萬鎊
5.美斯(足球) 6,200萬鎊