【官宣】驚喜嗎？拜仁簽入戴利白蘭特

足球博彩神器，每日重心提供盡在《彩報》：http://win.on.cc/football/　

阿積士早前突然宣布同老將戴利白蘭特解約之後，一度盛傳呢位32歲後衞可能重返曼聯，跟荷蘭同胞坦哈格搵食，但最終原來係加盟德甲勁旅拜仁慕尼黑，雙方簽約半年，令人大感意外。

戴利白蘭特出身於阿積士青訓系統，2014年轉投曼聯，4年後重返母會，當全世界以為呢位守將會效力阿積士至掛靴時，會方卻提早半年同佢解約，但並非嫌棄佢表現差，而係作為「禮物」，令白蘭特可以自由身轉會，再次加盟大球會，結果轉投咗拜仁慕尼黑。

拜仁高層沙歷咸美斯大讚戴利白蘭特技術全面，可以勝任中堅同左後衞，而且大賽經驗豐富，可以為球隊帶來重要貢獻。至於戴利白蘭特話好期待為拜仁上陣，認為球隊可以問鼎各項錦標。

戴利白蘭特2019年被驗出患有心肌炎，身體需要安裝起搏器，但佢仍然堅持足球生涯，並喺今屆世界盃16強對美國，射入1球。

拜仁陣中亦有另一位荷蘭後衞馬菲斯迪歷特，佢同戴利白蘭特喺阿積士及荷蘭國家隊都合作過，默契肯定冇問題。