巴塞免費放走比利連　或重返貝迪斯

最強博彩盤路過關神器《串績王》：http://win.on.cc/football/　

巴塞隆拿季前免費簽入比利連，不過呢位27歲右閘未受教練沙維重用，半季只係試過1次喺聯賽正選上陣。據報巴塞已決定提早同比利連「斬纜」，今個月畀佢自由轉會，盛傳貝迪斯好大機會簽入呢位前西班牙國腳。

比利連上季由阿仙奴外借貝迪斯，表現獲得好評，可惜貝迪斯因財政問題冇能力將佢收購，結果比利連同阿仙奴解約後轉會巴塞。比利連喺巴塞又係傷多過踢，右閘亦有巴迪、沙治羅拔圖同祖利斯古迪等選擇，比利連就變得可有可無。

據《世界體育報》報道，巴塞將同意畀比利連今個月免費離隊，以減輕薪酬開支，而貝迪斯後防阿歷斯摩蘭奴即將轉投阿士東維拉，消息指貝迪斯將會簽入比利連作為替補，成事嘅話可以話係「3贏結局」。