甸恩軒達臣做12碼英雄　被禁4強倒戈曼聯

足球博彩神器，每日重心提供盡在《彩報》：http://win.on.cc/football/　

諾定咸森林喺英聯盃8強互射12碼淘汰狼隊，由曼聯借用嘅門將甸恩軒達臣成為晉級英雄，佢喺互射12碼先救出魯賓尼維斯射門，再喺決定性嘅最後一射救出鶴治射門，帶領森林自1992年後再闖英聯盃4強。

森林喺4強抽籤收到噩耗，唔單止因為抽中對曼聯，更大問題係甸恩軒達臣將唔能夠上陣，根據英聯盃條例6.3所寫，外借球員(甸恩軒達臣)將會被禁止倒戈，除非原屬球會(曼聯)書面提出容許借將上陣。普通預料曼聯唔會咁大方，為自己晉級決賽之路增添難度。

森林領隊谷巴賽後表示：「呢個消息(軒達臣被禁倒戈)打斷我哋嘅慶祝，我好失望，特別係睇完甸恩軒達臣今場嘅出色表現......甸恩軒達臣係森林一份子，佢已經完全融入森林大家庭，知道佢唔可以喺4強上陣，破壞晒我今日嘅心情。」